ദുബായിലെ ഏറ്റവും പുതിയ പാര്‍ക്കുകളിലൊന്നാണ് ബര്‍ഷ പാര്‍ക്ക് ജനങ്ങള്‍ക്കിടയില്‍ സംസാര വിഷയമായിക്കഴിഞ്ഞു. ഏത് കാലാവസ്ഥയിലും വീടിന് പുറത്ത് കുടുംബസമേതം ജീവിതം ആസ്വദിക്കാനുള്ള ഇടമായിത്തീര്‍ന്നിരിക്കുന്നു ഈ വിനോദകേന്ദ്രം.

ആരോഗ്യസംരക്ഷണത്തിന് മികച്ച റണ്ണിങ് ട്രാക്കാണ് ഇവിടെയുള്ളത്. വാഹനമോടിച്ച് കളിക്കാന്‍ താത്പര്യമുള്ള കുട്ടികള്‍ക്ക് പ്രവേശന കവാടത്തിനടുത്ത് തന്നെ ബൈക്കുകളും കാര്‍ട്ടുകളും സജ്ജീകരിച്ചിട്ടുണ്ട്. കുട്ടികളുടെ കളിക്കളങ്ങള്‍ ഏറ്റവും ആധുനിക സൗകര്യമുപയോഗിച്ച് നിര്‍മിച്ചിരിക്കുന്നു. വലിയ കപ്പലിന്റെ ആകൃതിയിലുള്ള വിനോദകേന്ദ്രമാണ് ഇതില്‍ ഏറ്റവും ആകര്‍ഷകം. കപ്പലില്‍ പിടിച്ചുകയറിയും തുഴഞ്ഞും കുട്ടികള്‍ക്ക് ഉല്ലസിക്കാം. പുല്‍ത്തകിടിയിലുള്ള ബെഞ്ചുകളില്‍ സൊറ പറഞ്ഞിരിക്കുന്നതിന്റെ രസം ഒന്നു വേറെ.

ഭക്ഷണപ്രിയര്‍ക്ക് ബാര്‍ബിക്യൂ ഉണ്ടാക്കാന്‍ ഒട്ടേറെ സ്ഥല സൗകര്യമൊരുക്കിയിരിക്കുന്നു. കൂടാതെ, സ്‌നാക്ക്-പോപ്പ്‌കോണ്‍ ഔട്ട്‌ലറ്റുകളും കോഫി ഷോപ്പുകളുമുണ്ട്.